Imaamu Muhammadu Bun Alii Al Baaghir (a s)

heddinooɓe e sahaabaaɓe ɓen e taabi’iina en e fighi yankooɓe ɓen hino fillii e makko, khabaruuji ɗin hino yewti fii makko gimɗi hino yuɓɓaa fii mantugol mo.

Ibnu Hajar hino wi’i: Berde makko nden hino laaɓi, o laɓɓinno ganndal makko ngal e golle makko ɗen, wonkii makko kin hari hino laaɓi saa’iiji makko ɗin fow ko’e ɗoftaare Allaahu on o waɗi, himo mari konnguɗi buy yewtuɗi fii needi e faamuuji ɗi gasataa yewtaade e hoore hawjere.

Si tawii non ko yewtereeji makko ɗin hakkunde makko e yimɓe lunndiiɓe mo ɓen ɗun ko lollu ɗun, Allaama Tabrasii hino waɗi ɗun ka nder deftere makko AL ihtijaaj.

Sykhul Mufiidu hino wi’i ka nder deftere makko AL Irsaad : Fillayeeji ɗin yewtii wonnde wonnde Naafi’i Bunil Azragh ariino ka Muhammadu Bun Alii o jooɗii yeeso makko himo lanndoo mo fii ko dagii e ko harmi. Abuu Jaafar wi’i e nder yewtere makko nden:

Wi’u ɓee yaltuɓe e ka’a diina ko fii honɗun daginanɗon seedugol e imaamu Amiral muuminiina Alii (a s) on hibbii ƴiiƴan mo’on ɗan yeeso makko e nder ɗoftagol mo, e ɓattorgol Allaahu on wallugol mo

Sahinndineede mo (a s):

Imaamu Baaghir (a s) wuuriduno e lontiiɓe umawi yankooɓe ɓen: Waliid Bun Abdul Malik, Sulaynaan Bun Abdul Malik , Umar Bun Abdul Aziiz, Yaziid bun Abdul Malik, Hisaam Bun Abdul Malik, si tawii en ittitii jamaanu lontal Umaru Bun Abdul Aziiz ngal (duuɓi ɗiɗi e lebbi jowi) en taway wonnde jokkondiral hakkunde laamu umawiyankooɓe ɓen e Aalul Bayti en yaaraali yeeso.

Hari lontinooɗo wi’eteeɗo Hisaam Bun Abdul Malik on hino hoolii ko woni daƴƴere laawol lislamu sellungol ngol ko imaamu Baaghir (a s) ko fii ɗun waɗi si o ƴettunoo feere wonɗɗingol mo kapital soro makko ngal ( s a w) ngal wonunoo ngal teddinnde mo jaɓa konnguɗi makko ɗin – o naɓi mo Damas ka kapital Umawi yankooɓe ɓen- no’o hewtirnoo ton o naadaa kaso kisan si wonaa tun battinngol makko miijo yankewol ngol e hoore ɓe o tawtindiri ka nder kaso ɓen ɗun adduno yoɓe accitu mo, on tuma Hisaam tawi bee natta mo Madiina wano ɗun ariri ka nder fillayee Ibnu Sahar Asuub ka nder deftere makko Al Manaaghib, si tawii non ko ko Muhammadu Bun Jariir Tabarii fillii ka nder deftere makko kon (Dalaa’ilul Imaama) ko wonunoo sabu imaamu on acciteede ko sabu battingol mo e yimɓe Damas ɓen e sabu ko’o pooɗondirnoo e hooreejo annasaarankooɓe ɓen Damas o liɓi pehe makko ɗen o ɓanngini lo’ugol dalil makko on o jaabii jiɓiliɓiiji liɓanooɗi e hoore diina kan, yewtereeji ɗin ɗiɗi riiwindiraa ɓaawo ella alaa nde tawata piiji ɗin ɗiɗi non waɗii, imaamu on ko peewal ngal e goonga kan jokkata ka’o woni woo, fannii goɗɗo hino woodi ndaarayɗo hagghilla.

Ka lannoode ɓaawo politiki Umawi yankooɓe ɓen bonii ɓe maraa hiila ko ɓe warira imaamu on ɓe waɗani mo tooke e nder jamaanu Hisaam imaamu on feƴƴini ñannde jeeɗiɗi donkin hitaande 144 fergu ko’o munñiiɗo yanuɗo sahiid yo kisal wonu e makko ñannde o dañaa e ñannde o feƴƴini e ñannde o immintinoytee ko’o wuuruɗo.